Intal 1947, a doi agns de fin de Seconde vuere mondiâl, al ven fissât il gnûf confin tra la Italie e chê che e jere la Jugoslavie. Fin cuant che al colarà il Mûr di Berlin, intal 1989, il Friûl al ven jemplât di servitûts militârs, casermis e bunker, par difindisi de pôre de invasion: il confin al jere deventât la cortina di ferro, che e separave, tant che un mûr insuperabil, la Europe ocidentâl anglosassone, latine e democratiche di chê orientâl, slave e comuniste. Vuê cheste frontiere nus somee dome un brut ricuart, che o stin smenteant. La Associazion Culturâl El Tomât e scree, vinars ai 4 di Novembar aes 8.30 di sere te sede A.N.A. di Mont di Buje, la mostre “Immagini della cortina di ferro” di Stefano Morandini. Cu lis sôs imagjinis e i siei coments, al compagne cun memoriis e storiis di lûcs e di personis dentri struturis militârs aromai abandonadis e paisaçs familiârs. (A.I.) – 02.11.2022
Cuant che il Friûl al jere al confin de Europe
152