Daspò de Stele di bronç conferide dal Coni, il mestri di arts marziâls Gabriele Garcea, di Basilian, al à vût un altri ricognossiment prestigjôs, cheste volte dal president dal Consei regjonâl Piero Mauro Zanin: “O desideri ringraciâ – al à dit Zanin – il mestri Garcea che di plui di 40 agns al è un pont di riferiment pai karateka dal Friûl-Vignesie Julie. Dai agns Otante, cuant che al à tacât a insegnâ a Basilian, al à passât la passion par cheste dissipline a gjenerazions interiis di furlans, judant la lôr cressite sportive e umane in maniere ative”.
A Udin, il president Zanin al à consegnât il sigjîl de presidence dal Consei regjonâl dal Friûl-Vignesie Julie a Garcea dilunc di une cerimonie. A jerin presints il conseîr regjonâl Mauro Di Bert (Progetto Fvg/Ar) e il president dal Apd Basilian Raffaele Piticco. “Garcea – al à comentât Di Bert – al è un dai miôr mestris che a son in Italie e cumò al à diviersis cjariis a nivel regjonâl e nazionâl”. (ADG) – 25.11.2022
