Un zovin forest al è muart al cricâ dal dì di vuê dopo di un incident stradâl a S. Marc di Merêt di Tombe dilunc de ex strade provinciâl 60. Intant che al jere daûr a pedalâ in siele a une biciclete l’om si scuintrât cuntun camion e al è stât sbalçât par 10 metris intun fossâl.
Sul puest e je rivade une ambulance di Codroip e la machine di emergjence mediche di Udin. La Sores e à alertât ancje lis fuarcis dal ordin e i pompîrs.
Magari cussì no, ai socoridôrs nol è restât altri di fâ se no decretâ la muart dal om, pes feridis tant gravis ripuartais intal incident.
A Tresesin, invezit, dilunc de statâl Pontebane ae altece cu le crosere cun vie Udin, une machine si è crevade cuintri un platin e dopo e à cjapât fûc. Doi zovins a son restâts ferîts in maniere serie. Dopo l’alarme lançât cuntune clamade al Nue112, la Sores e à inviât une machine di emergjence mediche che di Udin e la ambulance di Tarcint. Sul puest ancje une scuadre des Vuardiis dal fûc che a àn lavorât par estrai lis personis dal abitacul. I doi zovins a son stâts traspuartâts al ospedâl Santa Maria delle Misericordia di Udin cu la ambulance.
Altri incident a Basilian. Dilunc de statâl 13 Pontebane, dilunc il trat tra Visepente e Cjampfuarmit, un zovin che si cjatave ae vuide dal so auto al à pierdût il control e al è lât a sbati cuintri un platin. Sul puest l’ecuipaç di une ambulance di Codroip e i pompîrs. Il zovin al è stât traspuartât al ospedâl di Udin in codiç zâl. (ADG) – 8.12.2022
