Cjoc, al à fat 16 chilometris dilunc de A23 cuintri man. Intai fastidis un vuidadôr di Villach, fermât vie pe gnot dai 8 di Dicembar de Polizie stradâl di Damâr. Ai agjents, impegnâts inte setemane de campagne europeane Roadpol pensade propit par dâi cuintri al fenomen de vuide sot dal efiet di sostancis alcolichis e droghis, aes 3.55 e je rivade la segnalazion dal Centri operatîf autostradâl.
Aes clamadis dai utents si son zontadis dopo lis imagjins des telecjamaris a circuit sierât che a imortalavin la station wagon de Kia intant che e jere daûr a passâ dilunc la cjarezade Nord de autostrade, chê che e puarte in Austrie, ma in sens contrari.
Il veicul al procedeve su la corsie di sorpàs. Daurman al è stât blocât il trafic ae altece de bariere autostradâl di Ugovize, cuntun mûr di veicui. In graciis di cheste soluzion, il vuidadôr cjoc al è stât fermât de patulie de Polizie Stradâl di Damâr. (ADG) – 9.12.2022
197
