“Il socors tecnic resint fat a Sapade dal secont elicotar sanitari dal F-Vj al riclame ancjemò une volte la atenzion sul ûs disinvolt di risorsis dal Servizi sanitari regjonâl (Ssr)”.
Lu scrîf intune interogazion presentade ae Zonte il Conseîr regjonâl dal Grup mist Walter Zalukar dopo che ai 7 di Dicembar, rivade une clamade di aiût di doi cjaçadôrs che a vevin pierdût il troi su lis monts a Nord di Sapade, e jere stade inviâde la eliambulance, ancje se no jerin problemis sanitaris viodût che i doi oms no jerin ferits o a stavin mâl, ma si jerin pierdûts suntun teren ert e no rivavin a lâ indevant di bessoi.
“Al jere un socors tecnic, tâl di no domandâ l’intervent di une équipe sanitarie e che duncje nol competeve al Ssr, ma aes Vuardiis dal Fûc, che pe ricercje di personis dispierdudis a puedin clama il propri Nucli elicotars di Mestre. Al pâr naturâl che, in câs ecezionâi, e in mancjance di altris mieçs, l’elisocors al puedi jessi doprât ancje par chei che o clamin socors tecnics, ma apont dome in vie ecezionâl, stant che l’ûs di une eliambulance par motîfs no sanitaris al pâr dal dut inadeguât jessint chest mieç dedicât al socors di personis traumatizadis o tocjadis di patologjiis acudis che par chês al covente agjî in curt e dome cuant “nol sedi pussibil rivâ, o rivâ par timp il pazient cun altri vetôr medicalizât. Di sotlineâ che intervents no coordenâts in chest cjamp al compuarte in maniere operative une soreesposizion di pericul, di là di rapresentâ un ûs no dovût di risorsis dal Ssr, che a podaressin jessi dopradis miôr”. (A.D.G.) – 14.12.2022
