Arestât in graciis de app dal telefon, intant che al tirave fûr bêçs cuntun bancomat robât

Îr il Gup di Udin Emanuele Lazzaro al à condanât cul rituâl scurtât un om di 31 agns di Basilian, a un an e doi mês di reclusion par robarie e ûs no dovût di cjartis di credit.
L’om al veve robât une borse di une machine ferme, ma al è stât incjastrât de app pe home banking. E je stade propit la aplicazion instalade sul telefon de vitime a permeti ae Polizie di cjapâlu intant che al gjavave i bêçs.
Dut al è sucedût ai 6 di Novembar dal 2021. l’om, difindût dal avocat Nicoletta Menosso, al veve rot il veri di un auto parcât fûr dal cimitieri di Udin e al veve puartât vie la borse di une siore di 80 agns, cun dentri contant, dôs cjartis di credit e un bancomat.
La vitime, su propueste de Polizie, e à controlât cul telefon il so cont corint e e à scuviert cussì che pôc prime cualchidun al veve fat un prelêf di un bancomat a Pasian di Prât. I agjents a son rivâts di corse e arestât il malvivent intant che al jere ancjemò devant dal machinari cun 1.750 euros in man, a pene gjavâts. (A.D.G.) – 16.12.2022