La orchestre dai zovins e je za un ‘classic’

Un classic dal Nadâl, ma no masse classic. Joibe ai 22 aes 9 di sere, al Teatri Sociâl di Glemone pe stagjon de Ert e il dì dopo, vinars ai 23, al Auditorium di S. Zorç di Noiâr, al è inmaneât il Conciert di Nadâl de Orchestre zovine Filarmonici Friulani e de Usci (Union des societâts corâls furlanis). Une grande produzion che e viôt la colaborazion tra la uniche orchestre under 35 de Regjon e doi des corâls di vôs blancjis plui impuartantis a nivel nazionâl: Artemìa di Tor di Zuin e Vocinvolo di Udin. Sul palc, un grup che al lavore adun pe prime volte, diret di Walter Themel, cun ospit il sopran Laura Ulloa, vincidore dal Premi nazionâl des arts pe liriche dal 2020. (A.I.) – 20.12.2022