“Jo o soi Friûl-Vignesie Julie e svole cun Ita, cussì si pues clamâ cheste une iniziative che e veicolarà la imagjin e i prodots de regjon a nivel internazionâl e che si poe su le potence di un messaç clâr e zovevul che di vuê al devente la livree speciâl di un avion di linie di Ita Airways”. Lu à dit vuê il governadôr Massimiliano Fedriga dilunc de presentazion dal Airbus A320 di Ita Airways “Jo o soi Fvj”, che pai prossims 18 mês al svolarà intai cîi de Italie e de Europe. Al avigniment al à partecipât ancje l’aministradôr delegât di Ita Airways, Fabio Maria Lazzerini.
Aes 10 e un cuart di matine, rivant di Rome Fiumicino, l’Airbus A320 di Ita Airways al è stât consegnât uficialmentri di Lazzerini a Fedriga e a Marco Consalvo, aministradôr delegât dal Triest Airport, che a àn ilustrât il progjet a stampe e ospits presints al avigniment. La livree di Ita Airways dedicade al Friûl-Vignesie Julie e acete il logo “Jo o soi Friûl Vignesie Julie”, il mot in inglês (“Everything you wish for is just a flight away”) e elements grafics de regjon, in linie cu la comunicazion coordenade de promozion dal teritori. La idee e je chê di comunicâ la esperience dal viaç, che al scomence prime di rivâ a tiere in Friûl-Vignesie Julie, lant sul avion di Ita Airways. (A.D.G.) – 21.12.2022
