Al è rivât insom il cantîr dal assensôr pal Cjistiel

Il cantîr dal assensôr che, di androne Sottomonte, al puarte al plaçâl dal Cjistiel di Udin al sta par sierâ. Dentri de fin di Zenâr, di fat, l’elevadôr al varès di podê jessi metût tal so puest.
“La dite e dîs di podê ultimâ la instalazion di ca di un mês – al fâs savê il vicesindic di Udin, Loris Michelini – duncje dopo al sarà completât in maniere definitive. Il cost de opare al è di plui di 600 mil euros. In chest mût o podarìn sierâ dut il lot dai lavôrs che a rivuardin la biblioteche civiche, che e je stade tornade a fâ, e plaçute Marconi, completade. Di là di chest assensôr, o stin preparant ancje i lavôrs pal secont lot, chel che al interesse place I° Maggio”.
In chest câs, il cantîr al è stât plui complicât a pet di chel de prime part. “Lis resons – al continue Michelini – a van cirudis intai coscj dai materiâi, cressûts, e ancje intai timps di consegne di chest secont progjet che al è tant plui particolâr, parcè che al à di lâ daûr al cuel dal Cjistiel”. (A.D.G.) – 28.12.2022