Tal mês di Novembar, un trop di oms, feminis, fantacins e fruts, components dal Grup Folcloristic di Pasian di Prât, insiemi cui lôr amîs di simpri, si cjatin a taiâ lis fueis des panolis che a vegnin racueltis e metudis in grum pe dì dai 5 di Zenâr dedicade ad implen ae preparazion dal grant fogaron: in cheste zornade, la part maschîl dal Grup si cjate cuant che il gjal al scomence a cjantâ, par cirî ducj i materiâi che a coventin par fâ sù un pignarûl une vore alt e fof e che a podedin jessi brusâts; chei mancul agjii, a cirin di dâ il lôr contribût puartant cui mangjative, cui alc di bevi, par dâ sostentament e confuart ai lavoradôrs ingrisignîts de criùre tipiche di cheste stagjon.
Il Pignarûl al è fat sù cun tassis di len e altre robe vecje di brusâ; di cualchi bande i picjin parsore ancje une pipine! Il so non al cambie di un paîs a di chel altri, come par esempli foghere, fogaron, fugarice, seima e in tantis altris manieris, daûr de tradizion dal puest. Une volte chest grues fûc si preparave tant che rituâl par domandâ che la anade e fos buine e che nol mancjàs nuie, nancje il pan e il vin e al è par chest motîf che, di cualchi altre bande, al ven clamât Pan e Vin.
Ma l’impiament dal Pignarûl e je dome une des tradizions che a animin la dì dal “Pan e Vin de Pifanie” a Pasian di Prât, manifestazion che in paîs e à une lungje storie che e partìs dal 1974 fin a rivâ ai dîs di vuê. Dilunc la Messe des 10.30, dai 6 di Zenâr, i components dal Grup Folcloristic “Pasian di Prât” a proponin lis leturis in Marilenghe vistûts cul costum tradizionâl e a puartin il “Pan” e il “Vin” tant che ufierte al siôr Plevan. Rispietant la tradizion religjose, ae fin de celebrazion il plui anzian dal paîs al da un salût di benvignût al ultin nassût par dâi bon acet inte comunitât Pasianese tant che simbul di leam tra dôs gjenerazions. Fûr de glesie, ancje i Trê Rês a puartin il lôr salût al picinin regalantji, in maniere simboliche, aur, incens e mire.
Tal cors dai agns, te dì de Pasche Tafanie, si son davuelts events di ogni sorte, di concierts in glesie, a spetacui dai components dal Grup Folcloristic, di spetacui teatrâi e di magjie par fruts e fameis. Chest an sul palc dal auditorium “Elio Venier” di Pasian di Prât, aes 15.30, i balarins e la orchestre dal Grup dal paîs, si esibiran balant e sunant alternantsi a cualchi sketch de esilarante Caterina Tomasulo in art “Catine” che nus presentarà in maniere divertente, feminis diferentis tra di lôr, dutis dal dut “imperfetis”, ognidune cjapade cu lis sôs problematichis di vite cuotidiane par regalâ al public cualchi ridade che no fasin mai mâl daspò doi agns di restrizions.
Il rituâl principâl, peât a cheste ricorince, al è l’impiament dal Pignarûl previodût pes sîs sore sere: finît duncje il spetacul, ve che un carateristic corteu di fogulis, compagnât di musichis e di cjants dai components dal Grup, si disvoluçarà tra lis viis dal paîs par rivâ li dal lûc dulà che al è stât tirât sù il pignarûl. Par tradizion, come che al sucêt in tancj puescj ator pal Friûl, une grande fole si tire adun par assisti al impiament dal fogaron di bande dal plui anzian dal paîs che prime al fâs un segn de crôs in direzion dai cuatri ponts cardinâi e po, come une volte, al cjale la direzion che al cjape il fum dal pignarûl par capî cemût che al sarà l’an a pene tacât: se al va a est, che si pues ancje dî “a soreli jevât”, al sarà un bon an, se al va a ovest e duncje “a soreli a mont”, al sarà un an dificilut.
E cussì, al reste dome di spietâ di passâ une zornade origjinâl cui amîs dal Grup Folcloristic di Pasian di Prât e recitâ insiemi, come che i nestris vons a profetavin: “Se il fum al va a soreli jevât, cjape il sac e va a marcjât. Se il fum al va a soreli a mont, cjape il sac e va pal mont”. Par festezâ in maniere dignitose i 50 agns de prime edizion de esistence di cheste magjiche ricorence, ai 7 di Zenâr simpri li dal Auditorium “E. Venier”, aes 20.30, al vignarà proietât il video “Lis stagjons de sperance” realizât dal Grup Folcloristic tal 1998, cul obietîf di riproponi la vite furlane di un timp tal alternâsi des stagjons. (D.M.) – 02.01.2023
