Al è di un muart e dôs personis ustionadis il belanç tragjic di un fûc svampât tor des 2.30 de gnot intune struture di Sante Catarine di Pasian di Prât che e ospite une comunitât par minôrs.
Lis Vuardiis dal Fûc a son rivâts sul puest cun scuadris de sede centrâl e dal distacament di Codroip, par studâ lis flamis intal edifici di trê plans di vie Campoformido.
Dilunc dai socors a son stadis cjatadis dôs personis feridis par ustions. A son un fantat di 16 agns, traspuartât in cundizions gravis cul elisocors al Centro grandi ustionati di Verone e di un adult, un educadôr de comunitât gjestide de Aedis Onlus, che al à ripuartât ustions in diviersis tocs dal cuarp; mancul grâf a pet dal zovin, l’om al è stât puartât intal ospedâl di Udin.
Par un fantat di 17 agns, ospit de struture, magari cussì no, nol è stât nuie di fâ se no aciertâ la muart.
Lis flamis a jerin partidis dal prin plan e a vevin colpît in maniere seguitive cuasi dute la struture. Dopo vêlis distudadis, i pompîrs a àn inviât lis operazions di messe in sigurece dal stabil e dal cuviert. Lis causis dal fûc a son ancjemò in cors di aciertament. (A.D.G.) – 31.12.2022
