Un miedi dal Dipartiment di Oncologjie dal Ospedâl di Udin al è stât selezionât de Associazione internazionale per lo studio del cancro polmonare (IASLC) pe partecipazion ae sô academie, il prossim Setembar 2023 a Singapore, e che i parteciparan 23 specialiscj selezionâts di dut il mont, par dopo concludisi cu la conference mondiâl sul cancar dal polmon.
Il miedi sielt al è Francesco Cortiula, che al lavore prin di dut sul tratament dai pazients cun neoplasiis toracichis e al svante esperience tant che ricercjadôr intal Ospedâl Universitari di Maastricht, dulà che si è interessât des interazions tra imunoterapie e radioterapie intai pazients cun tumôr dal polmon no a piçulis celulis e, cumò, al è daûr a fâ un dotorât di ricercje simpri inte struture olandese.
“O soi une vore braurôs par cheste pussibilitât – al conte Cortiula -. Il gno obietîf tant che ricercjadôr al è di contribuî a fâ simpri plui personalizât il tratament dai pazients cun tumôr dal polmon, miorant la lôr cualitât di vite e ridusint lis tossicitâts dai trataments oncologjics”. (A.D.G.) – 2.01.2023
