Il numar di beneficiaris dal Redit e de Pension di citadinance in Friûl-Vignesie Julie al è plui o mancul di 9.500 fameis (intal mês di Novembar 2022), che a cjapin dentri cuasi 15 mil personis. L’80% dai nuclis al cjape il Redit (7.515), il rest la Pension di citadinance (1.951). I impuarts medis a son di 475 euros pal Redit e 255 euros pe Pension di citadinance. Lu fâs savê il ricercjadôr de Ires F-Vj Alessandro Russo che al à rielaborât i dâts dal Inps.
Di cuant che a son stadis istituidis chestis misuris, al sclarìs Russo, il numar massim si è regjistrât intal Setembar 2020, cun pôc mancul di 13 mil nuclis beneficiaris in regjon; il minim al è stât tocjât a Fevrâr 2021, cun 7 mil beneficiaris. Inte ultime part dal 2022 il dât al è stabilizât su valôrs sot des 10 mil unitâts. Par lei in maniere corete i dâts, si à di calcolâ che un des carateristichis necessariis par otignî e mantignî il benefici al è che il Isee al sedi plui bas di 9.360 euros. Cheste cundizion e determine un sbassament a Fevrâr di ogni an dal numar dai beneficiaris, stant che une part dai stes nol risulte plui jentrâ in chest soiâr al moment de presentazion de gnove Declarazion sostitutive uniche (che par solit al sucêt apont al principi dal an). (A.D.G.) – 2.01.2023
