A Manià un premi ae ‘vôs’ dal cine talian

Il grant atôr talian Massimo Dapporto, innomenât ancje pal rûl di dopleadôr, al cjaparà martars ai 10, a lis 6.30 dopomisdì al Teatro Verdi di Manià, il Premi “Vocalia/Anime doppie”, seconde edizion dal ricognossiment ai dopleadôrs pe cualitât dal lôr lavôr. La iniziative e nas di une sezion dal festival musicâl Vocalia, promovût dal Comun di Manià, che al esplore une declinazion particolâr dal strument de vôs, ven a stâi une ecelence dal “made in Italy”: la dopleadure cinematografiche. La idee e je nassude in colaborazion cun Cinemazero e si concrete intun progjet di formazion sui mistîrs leâts ae dopleadure. Assegnât intal 2019 a Leo Gullotta e sospindût intai doi agns dopo pe emergjence Covid, il premi al è fat di un pâr di fuarpiis artesanâls. (A.I.) – 09.01.2023