E’ stade aprovade a maiorance – cu la contrarietât nete des oposizions – de V comission consiliâr, dopo la intese rivade dal Consei des Autonomiis locâls (Cal) il passât Otubar, la propueste di leç costituzionâl 19, o sedi la modificazion dal Statût speciâl dal Friûl-Vignesie Julie cu la reintroduzion intal test dal riferiment ai ents di aree largje in bande dai Comuns tant che pilastris dal ordenament locâl. A ilustrâle al è intervignût l’assessôr regjonâl aes Autonomiis locâls Pierpaolo Roberti.
Nucli essenziâl de riforme, cemût che al à spiegât Roberts, e je la modificazion dal articul 59 dal Statût speciâl, che ricjapant la impostazion dal articul 114 de Costituzion, al fisse cumò al come 1 che inte Regjon Friûl-Vignesie Julie l’ordenament dai ents locâi si fonde sui Comuns, ancje inte forme di citâts metropolitanis, e sui ents di aree largje, cuâi ents locâi autonoms obligatoris de Regjon, dotâts di propris statûts, podês e funzions, daûr dai principis fissâts de Costituzion e dal Statût stes.
Cuintri la restaurazion des Provinciis si son declaradis dutis lis oposizions in Consei regjonâl. La minorance e je ce tant critiche su la restaurazion dai ents intermedis volût dal centridiestre, che e aferme in sostance – cu la gnove architeture istituzionâl – il faliment de riforme precedente, tacade de maiorance, basade su la costituzion dai Ents di decentrament regjonâl intal percors di superament des Unions teritoriâls intercomunâls. (A.D.G.) – 10.01.2023
