Aumetâ il control par permeti a cui che al lavore inte sanitât plui sigurece. Al è cetant che al è vignût fûr de riunion dal Comitât pal ordin e la sigurece publiche che si è tignude cheste matine in Prefeture a Udin. Il Comitât al à esaminât, in particolâr, il câs de agression patide sabide di une specializande di 28 agns dilunc di un turni di vuardie mediche ae Jervasute di Udin.
Ae taule a àn partecipât il Prefet di Udin, Massimo Marchesiello, i cuestôrs di Udin e Pordenon, Alfredo D’Agostino e Luca Carocci, e i vertiçs teritoriâi de Arme dai Carabinîrs, de Vuardie di Finance di Udin e Pordenon, di là dal diretôr de Struture operative emergjence regjonâl sanitarie e dal diretôr gjenerâl di AsuFc.
Il vice president de Regjon Riccardo Riccardi al à fevelât di “Costrutîf confront tra istituzions, vertiçs de Aziende sanitarie universitarie Friûl Centrâl e fuarcis dal ordin par cirî intun soluzions zovevulis par garantî sigurece aes vuardiis medichis dilunc dal davuelziment dal lôr lavôr a servizi de comunitât”.
“La agressivitât, magari cussì no, al è un fenomen in cressi – al à sclarît Riccardi – e al è un probleme che al va frontât. Si sin cjapâts fin di daurman l’impegn di verificâ cuâi che a sedin lis dotazions tecnologjichis che si puedin implementâ lì des vuardies mediches, no dome al esterni des struturis, ma ancje intai ambients internis. O dîs graciis al Prefet Marchesiello par chest incuintri che al à permetût di condividi ancje la impuartante procedure di un colegament diret cu lis cuesturis intai câs là che si fasi necessari, inte emergjence, par agjî daurman. Forsit e coventarès – al à concludût Riccardi – ancje cualchi misure esemplâr viers di cui che al agredìs infermîrs e medics che a operin cun sacrifici a servizi di cui che al sta mâl e de comunitât dute”. (A.D.G) – 13.01.2023
