L’Inps Friûl-Vignesie Julie al à dai 1 di Zenâr un gnûf diretôr regjonâl. Al è Mauro Saviano, laureât in jurisprudence, classe 1972, che al à za diret diviersis sedis de Lombardie, tra chês Brescia e Monza e di ultin Milan, dopo vê fat servizi di prevenzion e contrast ae criminalitât organizade intal Ministeri dal Interni.
Dopo il master in Inzegnarie gjestionâl, otignût intal 2017 al Mip dal Politecnic di Milan, Saviano si è impegnât par meti in vore semplificazion e inovazion intai rapuarts tra Inps, aministrazions publichis e citadins.
“O presei lis cualitâts e la dimension umane di chest teritori – al dîs Saviano – e o speri di jessi part, tant che istituzion, di une regjon de tradizion culturâl profonde, buine di inovâ e impegnâsi di continui, cualitât che le puartin a jessi ae avanvuardie intal tiessût produtîf talian”. Saviano al sotentre a Paolo Sardi, che al à lassât la incarghe ai 31 di Dicembar. (A.D.G.) – 13.01.2023
