De taule taronde “Scuele, imprese e culture de sigurece” organizade vuê intal auditorium dal istitût Malignani di Udin a son vignûts sù tantis ispirazions impuartantis che a saran mitudis in chê che il diretôr dal Messaggero Veneto, Paolo Mosanghini – che al à coordenât i intervents – al à clamât la Cjarte di Lorenzo, dal non dal student Lorenzo Parelli muart l’an passât par vie di un signestri sul lavôr, intune aziende di Lauçà, inte ultime dì di alternance scuele-lavôr. La taule taronde e je nassude propit propit des riflessions lescjadis dal incident tragjic e e je stade volude a fuart de famee di Lorenzo, in colaborazion strente cu la Aministrazion regjonâl che e à acetât daurman e mitût in pratiche la idee.
Il president dal Consei regjonâl, Piero Mauro Zanin, al à anunziât pe ocasion un progjet impuartant: “tant che assemblee legjislative e di intese cu la Zonte – al à dit Zanin – si impegnìn a costituî inte legjislature prossime un Osservatori su la salût e su la sigurece intal mont dal lavôr. Al nassarà duncje un gnûf organisim di garanzie incjariât di aprofondî dutis lis tematichis che a àn a ce fâ cun salubritât e sigurece, inte otiche di un lavôr che al à di jessi al servizi dal om e no vicevierse, cemût che magari cussì no masse dispès al sucêt”.
Ae taule taronde e à partecipât ancje l’assessôr regjonâl al Lavôr, Alessia Rosolen che al à puartât i salûts dal Governadôr Massimiliano Fedriga. “La societât e cambie – e à osservât Rosolen – e no son plui suficientis leçs e memorandum, al devente fondamentâl costruî un percors di educazion e culture”. Il parlamentâr Walter Rizzetto, president de Comission Lavôr de Cjamare dai deputâts, al à cjapât invezit la ocasion par anunziâ che e je stade metude in calendari la sô propueste di leç sul insegnament obligatori de sigurece sui lûcs di lavôr intes scuelis secondariis.
La cunvigne – che i àn assistût ancje i conseîrs regjonâi Giampaolo Bidoli, Mauro Bordin, Chiara Da Giau, Furio Honsell e Diego Moretti – al à cjapât il mont de scuele, cu la diretore dal Ufici scolastic regjonâl, Daniela Beltrame, il dirigjent dal Malignani, Oliviero Barbieri, e don Lorenzo Teston, diretôr dal istitût Bearzi, la scuele di Lorenzo Parelli. Riflessions e ispirazions a son rivâts ancje dal sindic di Cjasteons di strade, Ivan Petrucco, di Beatrice Bertossi de Consulte regjonâl dai students, dal diretôr dal Ial, Gabriele De Simone, dal vicepresident di Confindustrie Udin, Anna Mareschi Danieli, dal sindicalist Matteo Zorn, segretari regjonâl Uil, e dal miedi e psicoterapeute Alberto Pellai. (A.D.G.) – 20.01.2023
