Intai prins nûf mês dal 2022 la ocupazion in Friûl Vignesie Julie e je cressude in medie di 16.500 unitât a pet dal stes periodi dal an di prime (plui 3,3%), cuant che la economie e jere ancjemò condizionade in maniere negative des restrizions par frontâ la pandemie. La cressite, al informe il ricercjadôr de Ires Fvj Alessandro Russo secont i dâts nazionâi e locâls, e à rivuardât soredut la industrie e la edilizie (plui 5,5% in ducj i doi i setôrs) e dome il lavôr dipendent (plui 4,2%). Il numar medi di disocupâts al è di 27.300 unitâts cuintri lis 30.400 dal periodi Zenâr-Setembar 2021.
In F-Vj, su la base de rilevazion condote dal sisteme informatîf Excelsior, lis impresis de industrie e dai servizis a stimin cuasi 11.00 mil jentradis di lavoradôrs a Zenâr 2023. Intal 55,5% dai câs a previodin di vê des dificoltâts a cjatâ i profîi professionâi ricercjâts, soredut pe mancjance dai candidâts (35,1%). Cheste percentuâl in provincie di Pordenon e rive scuasi al 60% (59,8%) e al è il valôr plui alt che si rileve a nivel talian. Tra lis professionalitâts che a presentin plui criticitâts a nivel regjonâl a son: i specialiscj in siencis informatichis, fisichis e chimichis (89,2%), i tecnics de sanitât, dai servizis sociâi e de istruzion (87,3%), i operaris specializâts inte edilizie e inte manutenzion dai edificis (76,9%). (A.D.G.) – 26.01.2023
