La Societât Filologjiche Furlane, cu la poie de ARLeF – Agjenzie Regjonâl pe Lenghe Furlane e invie lunis ai 6 di Fevrâr dal 2023 la cuarte edizion dal Cors pratic di lenghe e culture furlane in linie LC1 nivel di fonde, basât sui contignûts dal prin volum de golaine “Lenghe e culture” di Maria Chiara Visintin e Gabriele Zanello, dedicât a la formazion lenghistiche dai adults.
Il cors al è gratuit e si davuelç in 10 setemanis di ativitât in modalitât asincrone, su plateforme Moodle, li che a son proponûts piçui videos di introduzion ae storie dal Friûl; piçui videos di spiegazion des regulis di gramatiche; esercitazions di comprension dai tescj e de gramatiche; piçul test finâl par podê passâ ae ativitât sucessive. A son ativâts un forum di discussion par spiegazions e assistence e un sportel di conversazion in direte cui trê tutor dal cors, une volte par setemane daûr prenotazion.
Cun di plui a son in prevision 3 incuintris sincrons su plateforme Zoom, sù par jù di une ore ognidun, par fâ un detât e une leture e sburtâ l’interazion orâl cui tutor dal cors e cun chei altris corsiscj.
I materiâi didatics a son metûts su Moodle ogni setemane e a restin a disposizion in mût continuatîf, par che i partecipants a puedin davuelzi lis ativitâts dal cors in autonomie e tai oraris miôr.
I puescj disponibii a son 90. Iscrizions dentri di vinars ai 3 di Fevrâr 2023 a chest link: https://forms.gle/BFs4BuvminQP9chLA. Informazions tal Ufici Formazion de Societât Filologjiche Furlane, www.filologicafriulana.it, Elena De Sanctis, 0432 501598, int. 3; formazione@filologicafriulana.it. (A.D.G.) – 27.01.2023
