Al è stât sotscrit il contrat pe esecuzion dai lavôrs, che si spietavin di tant timp, di une gnove rotatorie di Palme, che e nassarà tal puest de crosere semaforiche tra lis stradis regjonâls 352 e 126 e il casel de A4. La sinergjie e la colaborazion tra il Comissari pe emergjence de A4 e la concessionarie Autovie Venete a àn permetût di anticipâ la sô realizazion. La notizie e je stade dade dal governadôr Massimiliano Fedriga e dal so vice Riccardo Riccardi. I lavôrs a scomençaran a fin Fevrâr / principi di Març, a duraran plui o mancul 8 mês e il cost complessîf al sarà di 3 milions e 290 mil euros. La modificazion de crosere e consintarà di miorâ in maniere significative lis cundizions di trafic leadis al congjestionament di un grop stradâl di rilevance regjonâl, che nol interesse dome i comuns di Palme e Bagnarie. (A.I.) – 31.01.2023
182
