Vuê a buinore, inte sede di Udine Mercati in plaçâl de Agriculture 16, al è stât presentât il progjet di slargjament des celis frigorifaris dal marcjât, e il progjet che i à permetût al Comun di Udin di posizionâsi al novesim puest de graduatorie taliane par acedi aes agjevolazions pal disvilup de logjistiche agroalimentâr midiant dal miorament de capacitât logjistiche dai marcjâts agroalimentârs ad in grues. Chest, inte suaze dal Invistiment 2.1 “Disvilup de logjistiche pai setôrs agroalimentâr, pescje e acuiculture, silviculture, floriculture e vivaisim” de Mission 2 “Rivoluzion verde e transizion ecologjiche” Componente 1 “Agriculture sostignibile e economie circolâr” dal PNRR, finanziât de Union Europeane e che al previôt pal Comun di Udin fonts par dîs milions di euros.
Presints al incuintri, il sindic Pietro Fontanini, l’assessôr regjonâl aes Ativitâts produtivis e turisim Sergio Emidio Bini, il vicesindic e assessôr ai Lavôrs publics Loris Michelini, l’assessôr aes Aziendis partecipadis dal Comun di Udin, Francesca Laudicina, e il President di Udine Mercati, Alberto Sbuelz. A jerin presints ancje i rapresentants des categoriis economichis e i puartadôrs di interès.
Il sindic Fontanini al à rimarcade la sô sodisfazion “par chest finanziament di 10 milions dal Pnrr che al rapresente no dome une promozion cul massim dai vôts de gjestion di Udine Mercati, ma ancje – cu la zonte dai 12 milions stanziâts de Regjon, sîs par slargjâ lis celis frigorifaris e sîs destinâts ae ristruturazion de ale Est – une ocasion uniche par fâ deventâ il nestri pôl agroalimentâr il pont di riferiment dal teritori che al merete di jessi. Un graciis duncje al President Sbuelz pal impegn e pes capacitâts che al à mostrât, e al Assessôr Bini e al President Fedriga par vê crodût intes potenzialitâts di cheste nestre realtât impuartante”.
“Il plan di slargjament presentât vuê – al à rimarcât l’assessôr Bini – al è un pas impuartant pe economie agroalimentâr regjonâl: il rûl strategjic dal Marcjât di Udin, no dome regjonâl ma ancje a nivel talian e european, al è certificât dal finanziament otignût cul Pnrr. La Regjon e à crodût in chest progjet, stanziant 12 milions di euros par realizâ oparis gnovis che i daran al Marcjât la pussibilitât di jessi un protagonist che al podarà tirâ la economie locâl, cuntune atenzion bande la sostignibilitât. Un progjet che no si podarès realizâ cence une aleance proficue tra ducj i atôrs cjapâts dentri – in primis il Comun e Udine Mercati – a pro dai consumadôrs finâi e dai produtôrs locâi”.
“Vuê – a son lis peraulis dal President Sbuelz – graciis ae vision condividude cul sindic Fontanini e cun dute la Aministrazion comunâl, al è stât fat il prin pas di un troi lunc che al puartarà a un gnûf marcjât o, miôr, a un gnûf mût di garantî un servizi public essenziâl tant che chel dal marcjât. Un prin invistiment di 22 milions di euros, cuvierts dai 12 milions de Regjon e dai 10 dal PNRR: cheste e je une ocasion uniche che nol sarà facil che si ripeti intai prossims agns e che, cuntun grant lavôr di scuadre e di relazions cun dut il teritori dal Friûl-Vignesie Julie, o vin savût cjapâ cun ricjadudis positivis su la ocupazion, su lis ativitâts economichis e sui gnûfs marcjâts”.
Il prin a jessi ilustrât al è stât il progjet leât al Pnrr, fat dai tecnics de STI Engineering S.r.l.
Il complès che al da acet a Udine Mercati al è inte aree Sud di Udin, tal plaçâl de Agriculture al numar 16. La costruzion dal fabricât e rimonte ae fin dai agns Setante. Il lot dulà che al è l’imobil, al è inserît – su la fonde dal Plan Regoladôr Gjenerâl Comunâl di Udin in vore – inte zone omogjenie H3, H3zau, “Imprescj comerciâi di completament”.
Dal pont di viste funzionâl e distributîf, il complès si disvilupe in plui edificis colegâts tra di lôr midiant de viabilitât interne e, cualchi volte, di cuviertiduris. Si jentre inte aree par doi acès cjarezabii, in direzion Sud, un dedicât al passaç dai mieçs pesants e des marcjanziis, e chel altri in funzion de zone dai uficis e de ex dogane. Un sisteme di viabilitât interne a anel al permet lis operazions dal cjamâ e dal discjamâ lis marcjanziis in diviersis zonis, sedi dal edifici li che al è stât fat l’intervent, sedi di altris locâi internis al complès di edificis. Il fabricât al à carateristichis tipichis industriâls e al è formât di un bloc unic di forme iregolâr, che al è il risultât di zontis che a son stadis fatis tal timp. I doi cuarps, poiâts un cuintri di chel altri, a son pe plui part costituîts di un nivel unic fûr tiere. Cualchidun dai concessionaris che a ocupin i box dai grossiscj inte aree de galarie di vendite al à realizât plateformis internis rialçadis a mieze altece, li che a àn acès dome dai lôr box di competence. L’imobil al à un aspiet vecjo, sedi a nivel di sisteme dal edifici che dal implant, e sedi di un pont di viste costrutîf e funzionâl.
I intervents a previodin di ricualificâ dal pont di viste de costruzion e dal aspiet energjetic une part omogjenie e indipendente dal sisteme edifici-implant, te otiche de riduzion dai impats ambientâi, e di inovâ e miorâ la eficience di procès e digjitalizazion des ativitâts e dai servizis leâts ae logjistiche.
Il risultât di cheste ativitât al à puartât a identificâ une serie di intervents principâi e significatîfs par miorâ la eficience dal sisteme edifici-implant, e par ridefinî e miorâ i flus e la organizazion funzionâl gjenerâl des ativitâts comerciâls che a son presintis.
Si trate, di une bande, di intervents di inovazion e di digjitalizazion de ativitât comerciâl, cu la realizazion – inte aree Nord de plateforme logjistiche atuâl – di un magazen automatic par imagazenâ e par dividi lis marcjanziis in jentrade, e pal supuart ae vendite midiant dai cjanâi e-commerce. In sostance, il magazen automatic al permetarà di organizâ e di otimizâ lis fasis di refilling (cjariament) dai prodots parcè che al podarà jessi gjestît in maniere autonome rispiet ai oraris di viertidure dal marcjât. Lis fasis di picking (prelêf) di prodots a podaran jessi gjestidis par furnî i magazens de grande distribuzion e dai Concessionariis dentri de viertidure dal marcjât, permetint in plui di doprâ il spazi al massim, di ridusi une vore la spese energjetiche par unitât di prodot e i coscj di lavoranzie, di eliminâ robariis e erôrs umans stant che lis marcjanziis a son simpri segnadis, di incressi la sigurece sul lavôr, di permeti di ridusi i straçaments alimentârs par vie che, segnant il prodot, a son in stât di garantî il timp just di permanence massime intal magazen, e di permeti l’e-commerce in mût che ducj chei che a àn une conession internet a puedin fâ acuiscj.
I concessionaris no ricevaran plui la marcjanzie dal ingrès Nord, ma dal gnûf magazen automatic, dopo che la marcjanzie e sarà tagade, spostade midiant dal sisteme automatizât di movimentazion dai pallets e disponude cun ordin inte aree di magazen e, di chi, spartide pe grande distribuzion o puartade li dal acès Ovest dal cjanalon inte galarie di vendite. Un sisteme di spuelis automatizadis AGV al distribuirà in maniere automatiche i pallets cu la marcjanzie ai concessionaris di competence, che a esponaran i prodots intes areis di vendite. I flus, di chest pont indevant, a rispuindaran ancjemò a chê che e je la organizazion esistente. Di chê altre bande si trate di intervents che a smirin a ridusi i impats energjetics e economics cuntun insiemi di intervents sul sisteme edifici-implant che si completin un cun chel altri, e che a permetaran di cualificâ l’imobil in ambit energjetic e ambientâl midiant di oparis e tecnologjiis tant che intervents puntuâi di rinfuarç struturâl, coibentazions dal cjanalon e des areis vendite, gnovis sieraduris verticâls, rifasiment dal cuviert des trê campadis centrâls de aree interessade, par sistemâ lis impermeabilizazions e il sisteme di racuelte des aghis meteorichis, creazion di une gnove centrâl tecnologjiche pai implants frigorifars e pal alozament de gnove cabine eletriche MT/bt e gnûf implant di disfredament de galarie di vendite, un gnûf implant di recupar de aghe ploiane, un gnûf implant di iluminazion ordenarie e di sigurece pe plateforme logjistiche e pe galarie di vendite, un gnûf implant fotovoltaic, colonutis di ricjarie pai veicui eletrics e un implant di trasmission dai dâts e di supervision.
La implantistiche gjestionâl e permetarà, midiant de realizazion di une architeture implantistiche inovative, la integrazion totâl tra i diviers sistemis tecnologjics, in maniere di rindi il marcjât une Smart Building, o ben une struture inteligjente e conetude dal pont di viste dal sparagn energjetic, de versatilitât funzionâl e de contabilizazion, e des operazions di manutenzion.
Par ce che al tocje il slargjament des celis frigorifaris, il progjet al à l’obietîf di realizâ une gnove plateforme logjistiche dentri de aree dal marcjât des pomis e des verduris dal Comun di Udin. Cumò sul plan di sedim dal marcjât des pomis e des verduris a son diviers edificis e plateformis logjistichis. Par slargjâ la ufierte e je in prevision la demolizion di cualchi manufat une vore vecjo e no plui adat al ûs, e la costruzion di gnovis plateformis, che a saran il prin lot dal gnûf progjet. L’intervent dal prin lot, viodude la presince sul puest di cualchi manufat che e je previodude la sô demolizion, si configure tant che un intervent di ristruturazion cun demolizion e ricostruzion. I edificis a son di proprietât dal Comun di Udin e a son identificâts al catastic al sfuei 57, mapâl 53.
La aree dal progjet a vuê e à une cuviertidure vierte, realizade cuntune struture prefabricade di ciment armât e cjarpentarie metaliche, e un capanon cun struture in ciment armât prefabricât e rivistiment in lamiere, doprât tant che marcjât contadin. Chest intervent si configure tant che il prin di trê intervents analics. L’obietîf al è di fat chel di slargjâ lis pussibilitâts logjistichis di dut il complès, realizant spazis gnûfs di imagazenament e di vendite, in stât di adatâsi daûr des voltis aes domandis dal marcjât, proponint manufats contemporanis, flessibii, cuntun contignût tecnologjic alt, e mantignint bas i consums e i coscj di manutenzion. (A.D.G.) – 01.02.2023
