Setemane pardabon impuartante pe marilenghe. Si scomence lunis ai 6 di Fevrâr, aes 5 e mieze dal dopomisdì, intal Salon dal Parlament dal Cjistiel di Udin, cu la presentazion uficiâl di “La Tv dai Furlans”, television dal dut in furlan che, tacant de stesse dì, il Gruppo Media Friuli – che za l’an passât al à fondât la gnove testade gjornalistiche “La Vôs dai Furlans” su cjarte e sul web – al metarà a disposizion dai telespetatôrs su “Telefriuli On Demand”, in graciis des tecnologjiis digjitâls plui modernis. A saran presints pe ocasion i vertiçs e i diretôrs dês testadis gjornalistichis dal grup.
La dì dopo, martars ai 7 di Fevrâr, aes 10 e mieze di matine, inte sede de Regjon a Udin, e sarà invezit la volte di un altri apontament impuartant. Il furlan al disbarcjarà prest sul Sociâl plui impuartant dal planet in graciis de colaborazion tra Regjon Friûl-Vignesie Julie e Mete. La Agjenzie regjonâl pe lenghe furlane e presentarà, di fat, al public la implementazion de marilenghe fra lis lenghis supuartadis di Facebook. Pe ocasion, in sale Pasolini a intervignaran l’assessôr regjonâl ai Sistemis informatîfs Sebastiano Callari, l’assessôr regjonâl aes Autonomiis locâls Pierpaolo Roberti, il diretôr di Aministrazion & Sociâl Impact Rosa Cialini, il president Insiel Diego Antonini, di là dal president Arlef Eros Cisilino. (A.D.G.) – 05.02.2023
