A Claut e rive la campionesse Carolina Kostner

Dopo il grant sucès dai Eyof, che a àn metût sot dai rifletôrs il paîs e dut il moviment sportîf dal cjanâl de Ciline, a Claut al torne un altri avigniment sportîf di no podê pierdi. Il palaç de glace “Alceo Della Valentina”, ristruturât in ocasion dal Festival olimpic, al è pront par la gnove viertidure uficiâl. La Aministrazion comunâl e à organizât une serade di inaugurazion in grant stîl, cun ospit di onôr Carolina Kostner, la campionesse di patinaç artistic, protagoniste di un spetacul pensât di pueste pe ocasion. L’apontament, intitulât “Dolomia On Ice” e sponsorizât de aghe Dolomia, al è in program sabide ai 18 di Fevrâr. Une part dal rigjavât de serade e sarà destinade in beneficence ae Aree Zovinis dal Centri di Riferiment Oncologjic di Davian. (A.I.) – 07.02.2023