Incident grâf dilunc de autostrade A34, intal trat tra Gardiscje e Vilès, in direzion Vilès. Par causis in cors di investigazion di bande de Polizie Stradâl, pôc prime des 11 e mieze di cheste matine si è verificât un scuintri frontâl tra dôs veturis; cinc personis a son restadis cjapadis dentri.
Stant aes primis ricostruzions, pôc prime dal plaçâl de bariere di Vilès, une Toyota Yaris e à invertît il sens di marcje, tornant indaûr e pôc dopo si è dade cuintri cuntune Audi A6, cun targhe serbe, che e lave bande la insedadure de A4.
La femine di 82 agns ae vuide de utilitarie e je muarte intal impat; par jê, incjastrade intal abitacul, nol è stât nuie di fâ. Feridis lis cuatri personis che a viazavin ta veicul di gruesse cilindrade; in mût tant grâf une femine di plui o mancul 45 agns, puartade in elicotar al ospedâl Sante Marie de Misericordie di Udin; in cundizions seriis une femine di 50 agns, traspuartade simpri al pront socors di Udin cu la ambulance. Une tierce femine, di plui o mancul 50 agns, e je stade traspuartade al ospedâl di Cattinara, simpri cun feridis seriis. La cuarte persone coinvolte, un minôr, al è stât puartât intal stes ospedâl in cundizions mancul grivis. (A.D.G.) – 09.02.2023
