“La Adunade nazionâl dai alpins dai 11 ai 14 di Mai e sarà dal sigûr un moment di fieste, di incuintri e di grande visibilitât pal teritori, ma ancje trasmission di valôrs, chei rapresentâts des Penis neris: spirt di sacrifici, disponibilitât par chei altris, sens di comunitât. E al è cun braùre che Udin e il Friûl-Vignesie Julie a deventin capitâl di chescj messaçs che il Cuarp dai Alpins al continue a puartâ indenant”.
Lu à dit il governadôr de Regjon, Massimiliano Fedriga, in ocasion de firme pe costituzion dal Comitât di onôr Adunade dai Alpins di Udin 2023, che al da il vie uficiâl ae part operative dal avigniment. La sigle si è tignude vuê inte sede de Regjon a Udin cun chei altris firmataris: il president de Associazion nazionâl dai Alpins (Ana) Sebastiano Favero, il sindic di Udin Pietro Fontanini e il president de sezion Ana di Udin Dante Soravito de Franceschi. Presint al incuintri ancje il gjenerâl di brigade Matteo Spreafico, Cjâf di stât maiôr dal Comant Trupis Alpinis. (A.D.G.) – 09.02.2023
