I financîrs dal Comant provinciâl di Udin a àn scuviert une fraude milionarie su fonts europeans. Lis Flamis zalis a àn dât esecuzion a un decret di secuestri preventîf, pandût dal Judiç pes investigazions preliminârs dal Tribunâl di Udin su domande de Procure europeane (European Public Prosecutor’s Office – Eppo) di Vignesie par un totâl di 1.581.009,75 euros.
Il proviodiment cautelâr al rive ae fin de operazion clamade ‘ Water Diviner’, scomençade intal 2020, cuintri di trê citadins talians e des dôs societâts riferibilis a un di lôr – une taliane e chê altre spagnole – beneficiariis di contribûts par cuasi 1,6 milions di euros concedûts intal ambit dal Program cuadri european pe ricercje e la inovazion Horizon 2020 e de programazion Por Fesr 2014-2020. I bants a servissin a sostignî impresis Start-Up inovativis che a garantissin un contribût pal benstâ e la sostignibilitât dal planet.
I tancj aciertaments fats dai financîrs di Udin, in coordenament cul Ufici european pe lote anti-frode (Olaf), che al veve segnalât il câs ae Procure europeane, a àn fat saltâ fûr dôs ipotesi di imbroi ingriviât in dam de Ue.
Il prin imbroi al sarès stât fae produsint ae Comission europeane falsis certificazions su lis funzionalitâts dal machinari e sul stât di avanzament dai lavôrs di realizazion di un implant futuristic ‘termodinamic’, bon di depurâ la aghe, e ancje di operâ in zonis isoladis, cun conession autonome internet e disfrutant dome la energjie solâr, in realtât mai completât, e nancje mitût in funzion.
Il secont imbroi al sarès staât fat par otignî fonts comunitaris di 113.169 euros dal Por Fesr 2014/2020, erogâts de Regjon Friûl-Vignesie Julie, traviers declarazions no veris e in violazion des disposizions dal bant, pe realizazion di un altri prototip dal stes machinari.
Il Jip dal Tribunâl di Udin, su domande dal Procuradôr delegât european dal ufici di Vignesie, al à mandât fûr un proviodiment di secuestri preventîf dal profit dai doi reâts di imbroi ingriviât pâr a 1,581 milions di euros, disponint ancje il secuestri dai prototips dal ordenadôr ‘termodinamic’, za in precedence sometûts a secuestri probatori dai financîrs. (A.D.G.) – 10.02.2023
