A Buri, ducj i segrets par “salvâ” lis sagris

Intai ultins agns, organizâ fieris, fiestis, spetacui o cualsisedi manifestazion temporanie al è deventât plui complicât. E rive a dâ un jutori la leç regjonâl n. 7 dai 3 di Mai dal 2019, chê che i disin “Salve sagris”, che e à introdot l’ufici “SOS Eventi Fvg”, dulà che ducj i sogjets interessâts a puedin indreçâsi. Chescj argoments a saran tratâts martars ai 15, aes 8.30 sore sere, inte Sale Europa dal Municipi di Buri, tal incuintri promovût dal Comun, “Organizzare un evento pubblico” (Organizâ un avigniment public). La serade, vierte a ducj ma in particolâr par parochiis, associazions, pro loco e ents dal tierç setôr, e vûl judâ cui che al opere intal setôr a orientâsi, ufrint une ocasion par sclarî dubis e aprofondî lis tematichis leadis ae organizazion responsabile dai avigniments. Une oportunitât impuartante par dutis lis realtâts dal teritori e une ocasion par vê rispuestis de bande di operadôrs cualificâts. (A.I.) – 14.10.2024