A Pordenon si cirin pianiscj cu la voie di sunâ dapardut

Pordenon si prepare a dâ acet ancje chest an ae fieste de musiche, cu la cuinte edizion dal festival “Piano City Pordenone”, in program dai 16 ai 18 di Jugn. Dal 1n di Març e fin ai 20 di Avrîl a son viertis lis candidaturis: i pianiscj interessâts a sunâ a Pordenon a podaran proponisi in maniere direte, in rêt, sul sît: www.pianocitypordenone.it. Ancje chest an, tant che intes trê edizions precedentis, il festival al sarà inmaneât in prossimitât de Fieste de Musiche, il cartelon dal Ministeri de Culture. Par dute la fin de setemane, Piano City – un ‘format’ nassût a Berlin – al ufrirà un program penç di concierts intes trê zornadis, de matine a sere, no dome intes salis istituzionâls, ma soredut intai spazis cuotidians e ancje intes cjasis privadis. (A.I.) – 28.02.2023