A Puçui e torne la sagre storiche dopo doi agns di polse

Dopo doi agns di polse sfuarçade cause pandemie, e torne a Puçui dai 29 di Lui ai 7 di Avost la Sagre dal struç, che e rive ae sô 24e edizion. Daûr de tradizion, a saran doi fins de setemane di musiche, divertiment e soredut di plasê pe bocje: la manifestazion e je cognossude ancje fûr dai confins regjonâi pe cualitât e cure de sô ufierte gastronomiche, cun tancj plats di cjar di struç dome di arlevaments furlans. La Sagre dal struç e je ancje une ecofieste ricognossude de Regjon, parcè che e je stade tra lis primis a pontâ al azerament dai refudums, doprant plats di ceramiche e tacis di veri, e ancje altris soluzions in favôr dal ambient. (A.I.) – 27.07.2022