E je stade fate a Udin la prime donazion di placente in regjon in graciis de colaborazion tra la Cliniche di Ostetricie e Gjinecologjie dal Ospedâl di Udin, il Centri Regjonâl Traplants e la Bancje dai Tiessûts dal Venit.
La donazion no à consecuencis su la mame o sul frut o la frute e e je une procedure divierse e separade de donazion dal sanc dal cordon umbilicâl; dopo il tratament de mari pe separazion de membrane amniotiche, une dai siei components, cheste ultime e ven conservade li de Bancje dai Tiessûts e metude a disposizion dai reparts che a ‘ndi fasin domande.
“La placente e pues jessi donade cuant che il part fat cun tai cesari programât dopo la trentesime cuinte setemane e se no son malatiis impuartantis inte mame o intal frut o inte frute. Il personâl sanitari de Cliniche di Ostetricie al propon la pussibilitât di donâ la placente aes mamis intal cors de gravidance, prime dal cesari” e sclarìs Lorenza Driul, diretore de Cliniche. (A.D.G.) -03.04.2023
(Foto: Asufc)
