Il consei comunâl di Pinçan al à decidût a largje maiorance di aderî ae Assemblee di Comunitât Linguistiche Furlane (Aclif), l’organisim che al met adun lis comunitâts dulà che e je fevelade e ricognossude la lenghe furlane. Un passaç impuartant, no dome parcè che al è il Comun numar 149 a jentrâ, ma ancje parcè che cu la jentrade di Pinçan si complete il numar da lis adesions su la rive drete dal Tiliment intal Friûl Ocidentâl. Di fat cumò, di Vît fin jù a S. Michêl (passant juste apont par Pinçan, Spilimberc, S. Zorç da la Richinvelde, S. Martin, Voleson Darzin, Cjasarse, S. Vît dal Tiliment e Morsan da lis Ocjis) ducj i comuns da la rive a son dentri de Assemblee.
Il sindic di Pinçan Emiliano De Biasio al fâs cussì il so prin pas, adun cun chei altris coleghis furlans, ai 7 di Novembar a Udin, inte assemblee gjenerâl de Aclif, dulà che dentri e sarà fate la ratifiche.
Une vore sodisfat il president de Aclif Daniele Sergon, sindic di Caprive: “Mi plâs – al evidenzie Sergon – ricuardâ simpri che fâ part de Aclif e je une libare sielte dai Comuns, une decision che e nas e e cres dal bas. La jentrade di Pinçan e je impuartante ancje intal discors de tutele e de promozion da la marilenghe intal Friûl Ocidentâl: vê ariis omogjeniis par adesion a la Aclif, come che cumò al capite pai Comuns da la rive drete dal Tiliment, al è un element positîf in plui par inviâ colaborazions. O tirìn dentri Pinçan intai nestris progjets: cunvignis, cors di formazion pai ents locâi, scambis di esperiencis cun chês altris minorancis linguistichis de Italie, campagne par incressi i programs radiotelevisîfs che a rivuardin il Friûl e vie indenant”.
Nassude intal 2015 par volontât di uns cincuante Comuns “pionîrs”, Aclif e je cressude une vore a la svelte intai agns: i Comuns a jerin za deventâts 114 intal 2017, 138 intal 2021 e cumò juste apont si e rivâts a cuote 149. E cjape dentri Comuns da lis trê vecjis provinciis di Udin, Pordenon e Gurize, ma ancje cualchidun dal teritori di Puart, di un pont di viste storic part dal Friûl, cumò sot da la citât metropolitane di Vignesie, dulà che ancjemò in dì di vuê si fevele par furlan. (a.d.g.) – 31.10.2024
