Cutuardis sportei di scolte e informazion sul diabete, une malatie sotvalutade che e cjape 4 milions e mieç di personis in Italie e almancul 90 mil in regjon. Il Friûl-Vignesie Julie al è di fat une des areis cu la incidence plui alte a nivel talian, tra il 6 e il 8 par cent daûr dai dâts dal 2018. La campagne di prevenzion e nas di une idee de Associazion fameis diabetics de Basse Furlane e e je stade presentade vuê, su iniziative dal Consei regjonâl, inte sede di Udin de Regjon in vie Sabbadini.
“Ative di 44 agns sul teritori, la Associazion e à cjapât ispirazion dai moments plui dûrs de pandemie par imagjinâ – tant che al à sclarît vuê il vicepresident Nicola Tonini – un servizi ancjemò plui dongje dai citadins, inmaneât in 14 teritoris de Basse: Dael dal Friûl, Bagnarie, Cjarlins, Çarvignan, Flumicel – Vile Visentine, Gonârs, Tisane, Maran Lagunâr, Rivignan – Teor, Rude, S. Zorç di Noiâr, Talmassons, Tor di Zuin e Trivignan Udinês. Un servizi, al è ben precisâlu, dal dut gratuit e pront a partî za di Zenâr”.
“Tant che aministrazion regjonâl o vin sostignût daurman chest progjet – al à sclarît Piero Mauro Zanin, president dal Consei regjonâl – parcè che e je une rispueste concrete ai bisugns di salût dai citadins, un esempli di buinis pratichis intal segn di chê sanitât teritoriâl che e ven domandade di plui bandis par scjariâ il lavôr di ospedâi e centrâls di pront socors”. (ADG) – 9.12.2022
