Informest e la Scuele Mosaiciscj dal Friûl a àn firmât un acuardi di colaborazion par judâ l’istitût intal acès aes fonts di finanziament de programazion comunitarie 2021 – 2027, midiant de partecipazion a progjets e l’inseriment in colaborazions strategjichis. L’acuardi al è stât siglât ai 13 di Fevrâr a Spilimberc inte sede de Scuele dal president di Informest Boris Dijust e dal president dal Consorzi pe Scuele Mosaiciscj dal Friûl Stefano Lovison; presints ancje il diretôr de Scuele Gian Piero Brovedani e il diretôr di Informest Graziano Lorenzon.
“Al è par me un onôr – al à declarât il president di Informest – podê jessi partecip di chest disvilup in clâf inovative de tradizion antighe de art musive che cheste istituzion e à savût promovi deventant une ecelence internazionâl. La Scuele Mosaiciscj dal Friûl e je une di chês realtâts che a dan lustri ae nestre Regjon”.
Sodisfazion e je stade esprimude ancje dal president Lovison che al à declarât: “l’acuardi di colaborazion sotscrit tra Informest e la Scuele Mosaiciscj al darà une altre sburtade ae Scuele stesse par proietâle intal panorame internazionâl dal marcjât dal lavôr, turistic e soredut inte promozion de art musive regjonâl”.
Il protocol di intese al previôt che Informest al dei supuart inte individuazion de linie di finanziament o program plui juste par sodisfâ lis necessitâts de Scuele Mosaiciscj, impegnantsi par favorî ancje la ativazion di colaborazions a nivel regjonâl, nazionâl e internazionâl finalizadis ae partecipazion ai bants, di là di cooperâ inte scriture tecniche des propuestis progjetuâls. (A.D.G.) – 14.02.2023
