Corot a Codroip pe muart di Carla Comisso

E je muarte vuê di matine a 51 agns Carla Comisso, presidente dal Consei comunâl di Codroip. A puartâle vie al om, ai doi fîs e ae comunitât in corot, une malatie che cuintri di jê si bateve di timp.

A visâ de muart de aministradore e za candidade sindiche dal Centriçampe intes elezions dal 2011 – vinçudis di Fabio Marchetti – al è stât il sindic Guido Nardini, che ancje Comisso e veve sostignût tal 2022 risultant la seconde plui votade de liste “Polo civico”.

“Di vuê o sin plui di bessôi – al à scrit sul so profîl Facebook il sindic Nardini -. Nus mancjarà la tô bocje ridinte, la tô voie di vivi e il to donâsi cun passion, onestât e impegn a ognidun di noaltris e ae comunitât di Lonche e di Codroip”. (a.d.g.) – 24.01.2025