Cuatri personis cun disabilitât cun ancjetancj acompagnadôrs a podaran svolâ bande la capitâl de Gjermanie, indulà che si fermaran cualchi zornade. Chest viaç al jere il travuart de racuelte di bêçs “Voliamo sopra Berlino – Viaggio inclusivo in aereo nella città che abbatte i muri”, inmaneât de Comunitât Piergiorgio Onlus di Udin par realizâ il sium di cjapâ un avion di cualchi persone disabile.
E cussì, Nadia Macorig, Monica Gogiatti, Dario Bertoli e Vanessa Simonit a podaran rivâ a Berlin compagnadis des educadoris de Comunitât Lucia Presacco, Claudia Zambano, Cristiana Cettolo e de volontarie Vanda Tioni.
Cui bêçs tirâts su’ dilunc de campagne di racuelte su la plateforme di crowfunding IdeaGinger.it dai 25 di Març ai 25 di Mai di chest an (10.850 i euros tirâts su’ di 115 donadôrs) a saran paiadis dutis lis spesis dal viaç. (a.d.g.) – 06.09.2024
