Ancje chest an la Fondazione Friuli e à fat il Bant Istruzion, ven a stâi un font di 600 mil euros, ancje in gracie dal sburt di Intesa Sanpaolo, par sostignî progjets di servizis didatics e inovatîfs intes scuelis des provinciis di Pordenon e di Udin. Prin di dut a saran judâts il doposcuele, lis ativitâts di gjinastiche e di bonstâ, come ancje i rapuarts tal forest. E i esemplis za fats, vie pe presentazion dal Bant, no mancjin, come chel dal istitût “Paschini-Linussio” di Tumieç, che al à puartât i students tai centris di ricercje in Olande o chel dal liceu sientific “Grigoletti” di Pordenon, che al larà fin in Cine.
“O crodìn che une scuele che e ‘braçole’ i students e sticedi la lôr curiositât e la passion di imparâ e e fâs deventâ plui fuarte dute la nestre comunitât – al à dit il president de Fondazione Friuli Giuseppe Morandini -. Nus plasin massime i progjets che, doprant gnûfs trois di insegnament, a cjalin soredut ae persone in taront”.
“A son i progjets di sisteme, come chescj, che a garantissin il disvilup de inovazion sociâl e tecnologjiche tes scuelis” e à zontât la assessore regjonâl Alessia Rosolen, vie pe presentazion fate tal palaç Antonini Stringher a Udin.
Lis domandis par vê un contribût a van fatis dentri dai 20 di Març. (r.c.) – 18.02.2025
