Di arlêf de Scuele mosaiciscj a diretôr artistic in Messic

I arlêfs dal tierç cors de Scuele Mosaiciscj dal Friûl a àn vût la ocasion di lâ daûr un periodi di pratiche di une setemane cul mosaicist Giuseppe Semeraro che al à zontât ae lôr formazion altris competencis di caratar progjetuâl e gjestionâl.

Semeraro al è stât arlêf de Scuele ae fin dai agns Nonante e dopo insegnant dal 2001 al 2007 di mosaic prime di tacâ une cariere brilante in Messic. Vuê, a Cuernavaca, al è art director de grande aziende Mosaicos Venecianos de México, une realtât fondade intal dopovuere, che conte plui di 400 dipendents e si interesse di mosaic a tresinte e sessante grâts, de produzion stesse dai materiâi, fin ae instalazion, cence trascurâ dal sigûr ideazion e progjetazion. (A.D.G.) – 20.12.2022