Consegnât intal cors di une cerimonie curte, lunis ai 16 di Zenâr inte aule magne dal Ospedâl di Tumieç, un gnûf ecografo di ultime gjenerazion, dedicât aes investigazions di diagnostiche senologjiche inte Radiologjie dal stes ospedâl: la strumentazion e je stade donade dal Comitât Andos odv di Tumieç che al à promovût la racuelte fonts che in pôcs mês e à permetût di rivâ ae cifre juste pal acuist.
L’ecografo al è dotât dai programs plui resints presints sul marcjât, e al è bon di otignî imagjins a alte risoluzion di cualitât ecelente.
Il president dal Comitât, Sonia Piller Roner e à visât che “Chest risultât al è stât pussibil in graciis de poie di aziendis privadis dal Alt Friûl, grups di volontariât di paîs, citadins singui; ancjemò une volte la sensibilitât e gjenerositât di tancj e à permetût di alçâ ancjemò di plui la cualitât des prestazions erogadis a pro des feminis dal nestri teritori tant che za sucedût cu la donazion de Tomosintesi mamografiche in agns resints”.
Presints ae cerimonie il diretôr sanitari di Asufc, David Turello, il diretôr dal Presidi di Sant Denêl – Tumieç, Loris D’Orlando, il diretôr de Radiologjie, Massimo Valentino, il president di Andos, Piller Roner, l’assessôr aes Politichis sanitariis e sociâls dal Comun di Tumieç, Marioantonio Zamolo. (A.D.G.) – 17.01.2023
