E torne a vierzi la mense pe scuele Bellavitis a Udin

Di martars ai 17 di Otubar al è tornât a partî il servizi di mense e di doposcuele li de scuele secondarie di prin grât Bellavitis, intal cuartîr Aurora di Udin. “La mense scolastiche e rapresente un servizi tant impuartant a disposizion dai fruts – al à dit l’assessôr ae Culture e Istruzion Federico Pirone – parcè che ur ufrìs un supuart concret dal pont di viste educatîf e sociâl. Alore o vin decidût di slargjâ il servizi ancje ai fantats de scuele Bellavitis, vignint incuintri de domande presentade dal Istitût comprensîf e de Associazion ‘Il Pellicano’ rinfuarçant la ufierte educative dal teritori e ufrint une poie aes fameis”. Intal istitût in vie 25 aprile, che al conte in totâl 139 iscrits, i arlêfs a podaran consumâ il gustâ, ae fin dal orari scolastic, intai locâi de mense de scuele primarie Friz. (a.d.g.) – 18.10.23