Il president de Agjenzie, Eros Cisilino, e la presidente dal festival, Cristina Mattiussi, a àn rinovât il protocol di intese che tai ultins 10 agns al à fat rivâ a Cividât produzions di alte cualitât in lenghe furlane.
«Il Mittelfest al è un lûc dulà che si cjatin tra di lôr lenghis, ma ancje culturis diviersis de Mitteleurope. Di tancj agns, al è ancje un dai spazis plui preseâts pes produzions artistichis in lenghe furlane – al à ricuardât il president Cisilino -. In graciis dai protocoi firmâts tai agns passâts o vin inmaneât spetacui che a àn vût un grant sucès. Al è propit in chest agâr che o larìn indenant a colaborâ, e cun cheste gnove firme o confermìn ancjemò une volte che i nestris doi sogjets a àn intenzions compagnis».
«La colaborazion cu la ARLeF e insiore il Mittelfest e e infuartìs inmò di plui la rêt di relazions che o vin disvilupade in chescj agns, cun chê di jessi simpri plui inlidrisâts intal teritori, lant dilunc a mantignî une vocazion internazionâl – e à marcât la presidente Mattiussi –. La volontât comune e je une vore clare: promovi la lenghe furlane cun progjets culturâi e artistics che a vedin une cualitât une vore alte».
Di fat, la liste des produzions ARLeF-Mittelfest in passe dîs agns di colaborazion e je lungje. Par citâ dome chês plui dongje di nô, tal 2019 al è lât in sene il spetacul “Maraveis in sfrese”, tribût ae musiche e ae art dal Friûl, dal secul XVI fin vuê. L’an dopo al è tocjât a “Giorgio Mainerio, un misteri furlan”, che al à tornât a dâ vite ai fats che a vevin puartât denant dal tribunâl de incuisizion il music de cort patriarcjâl, acusât di eresie e po dopo assolt tal 1563. Tal 2021, invezit, la colaborazion fra la Agjenzie e il Festival e je rivade a puartâ in Friûl une ospite di gale: Tosca, che pe prime volte e à cjantât par furlan tal conciert “Timp e Tiare”. Cualchidune di chestis produzions e je lade in onde ancje su Rai5. La colaborazion tra ARLeF, Mittelfest e CSS Teatro stabile di innovazione FVG, invezit, e à puartât in sene “Maçalizi – Il dio del massacro”, la version in lenghe furlane de comedie “Le Dieu du carnage”, de dramaturghe Yasmina Reza. Il spetacul al à debutât al Mittelfest2022 e al à vût un grant sucès di public sedi in chê ocasion che dopo, cuant che al è stât puartât ator pai teatris.
Cul rinovâ il protocol di intese, la ARLeF e il Mittelfest a infuartissin il lôr rapuart di colaborazion, tal rispiet des particolaritâts istituzionâls di ognidun dai ents, par garantî che il spetacul e la comunicazion des arts dal vîf in lenghe furlane a vedin une visibilitât simpri plui grande. (a.d.g.) – 05.03.2024
