Si fâs dongje la edizion numar 47 de “Fieste de Patrie dal Friûl” e, cemût che e previôt la leç regjonâl 6 dal 2015, la ARLeF – Agjenzie Regjonâl pe Lenghe Furlane e à publicât un bant par sostignî lis manifestazions culturâls inmaneadis dai ents locâi par celebrâ la date di costituzion dal Stât patriarcjâl furlan, il 3 di Avrîl dal 1077. Pal 2024 la Agjenzie, daûr di chel che e à deliberât la Regjon Autonome Friûl-Vignesie Julie, e à metût a disposizion 57.500 euros.
A podaran vê acès ai fonts i Comuns che a vedin sede legâl intai teritoris des ex provinciis di Gurize, Pordenon, Udin e i siet Comuns furlans de Regjon Venit (Cint, Concuardie, Fossalte, Gruâr, Puart, San Michêl dal Tiliment, Tei).
Il bant – a disposizion sul sît istituzionâl de Agjenzie www.arlef.it – al fisse che a saran finanziadis lis ativitâts indreçadis a valorizâ lis origjins, la culture e la storie di autonomie dal popul furlan. In particolâr: events che a pontin a fâ cognossi e/o aprofondî lis lenghis, la storie e la culture dal Friûl; ma ancje la stampe e difusion di publicazions che a vedin chest stes obietîf; in fin la preparazion di spetacui teatrâi o musicâi in lenghe furlane. A son esclududis lis domandis là che il finanziament domandât al è plui bas di 500,00 euros, e chês là che la spese calcolade amissibil e sedi inferiôr a 555,56 euros.
Lis ativitâts culturâls a podaran jessi inmaneadis di un ent locâl ugnul o di agregazions. Lis domandis a varan di rivâ dentri dai 12 di Fevrâr dal 2024, dome midiant pec ae direzion: arlef@certgov.fvg.it
Par dutis lis informazions sul chest bant, si pues clamâ il numar 0432 555910, o scrivi a: federica.delpino@regione.fvg.it. (a.d.g.) – 23.01.2024
