La gastroenterologjie dal ospedâl Santa Maria della Misericordia di Udin al à une gnove primarie. Dal 1° Avrîl a à assumût la incarghe la dotore Debora Berretti, 50 agns a pene compîts, cun aes spalis ben 20 agns di esperience al ospedâl di Udin tant che miedi dirigjent. Nassude a Rimini, Berretti si è laureade in Medisine e chirurgjie intal 1997 ae Universitât di Bologne, par dopo specializâsi in Gastroenterologjie intal 2001.
A passâ il testemoni a Berretti il dotôr Maurizio Zilli, di plui di 40 agns in gastroenterologjie, i ultins 20 tant che diretôr. A lui al va il merit di vê fat cressi la endoscopie digjestive furlane intal ambit di une gastroenterologjie complete, cu lis sôs valencis clinichis, medichis e chirurgjichis.
“lu ai fat cun cui che al à maridât il gno progjet, e ancje cun cui no nus crodeve…” al declare Zilli. “Chel progjet si è concretizât inte equipe di miedis e infermîrs che o ai formât e cun cui o soi cressût in chescj agns, ben lade dentri intal panorame nazionâl, che i lassi in ereditât il “pês” e la “sburtade” de progjetualitât future”. Adg
