In graciis dai fonts Ngs 2021, il Cro di Davian al à otignût cuasi 150 mil euros par fâ gnûfs esams intal so laboratori pal secuenziament gjenetic dai tumôrs, util par cjatâ malatiis oncologjichis leadis aes alterazions gjenomichis.
“Dal 2015 o vin disvilupât il servizi di Diagnostiche molecolâr dai tumôrs solits come percors integrât cu la struture di Anatomie patologjiche – al à displeât Gustavo Baldassarre, diretôr de Unitât di Oncologjie molecolâr -. Il laboratori al è un dai pôcs in Italie za certificât cu lis normis Iso 15189 e tal 2022 al è stât ricognossût tant che centri acreditât par fâ i test gjenomics Ngs de Regjon Friûl-Vignesie Julie e, cumò, ancje dal Ministeri de Salût”.
Il disvilup de Onclogjie di precision e permet di dâ a ogni persone la miôr cure pussibile ancje su la fonde des alterazions molecolârs dal tumôr. La rivade dal gnûf test par cjatâ i tumôrs Hrd al è il risultât dal impegn dal servizi di Diagnostiche dai tumôrs solits coordenât di Roberto Doliana e Monica Schiappacassi, in colaborazion cui tecnics dal laboratori. (a.d.g.) – 05.03.2024
