I citadins di Cividât clamâts a netâ il Nadison

Dôs zornadis di sensibilizazion ambientâl e di netisie des rivis dal flum Nadison. La seconde edizion di ‘Il Nadison par ducj’, dopo il sucès dal an passât, inmaneade cun dutis lis associazions e realtâts teritoriâls che a àn a cure l’ambient e lis bielecis naturâls, al à tant che obietîf chel di sensibilizâ lis gnovis gjenerazions. Si tache vinars ai 21 cu lis ativitâts didatichis pes Scuelis primariis inte splaze di Borc Brossane, par cure dal Grup di pescjadôrs di Cividât e de associazion Manta Sub. Sabide ai 22, des 9 di matine, lis ativitâts di pulizie e manutenzion dai trois di jentrade al flum e di ciertis zonis dongje: une ativitât pensade pes associazions sportivis, culturâls e di volontariât, ma ancje par ducj i citadins. (A.I.) – 20.04.2023