Il cine ‘fat in cjase’ prime dai telefonins

Gnûf apontament cul festival itinerant “Cine di Famee”, un avigniment unic inmaneât de cooperative Belka Media, cul contribût de Regjon e ospitât chest an dal Comun di Cjampfuarmit. La manifestazion e va indevant cul so viaç traviers il timp, puartant cun se il magheç dai vieris filmâts amatoriâi in pelicule fats intun timp, no masse lontan, cuant che filmâ moments di vite cuotidiane cuntune cineprese “domestiche” al jere pardabon un rituâl. Chei filmins in Super8 e 8mm, che a contavin fiestis, feriis e piçui o grancj moments di vite prime che a rivedin i telefonins, a son vuê un preziôs voli su la nestre storie resinte. Il progjet al è tacât intal 2012 de idee di Massimo Garlatti-Costa e di Elisabetta Ursella, e al sarà presentât inte ex scuele di Bresse. (A.I.) – 16.01.2025