“Il coraç des feminis” a Gonârs

Si clame “Il coraç des feminis” la rassegne par ricuardâ la zornade internazionâl cuintri la violence su lis feminis, metude in pîts de Comission pes Oportunitâts Parelis dal Comun di Gonârs, in graciis dal finanziament de Regjon autonome Friûl-Vignesie Julie. Il prin apontament al sarà vinars ai 8 di Novembar, aes 8 e mieze sot sere, alì dal Centri Civic di Favuîs, cu la leture in musiche “Fiore di Roccia”, par cure di Andrea Miola e in colaborazion cul Sportel associât pe lenghe furlane, gjestît de Societât Filologjiche Furlane. La narazion su la storie des puartadoris cjargnelis, gjavade fûr dal libri di Ilaria Tuti, e ven insiorade des musichis di chei timps (come “Di stella in stella” di Tita Marzuttini, “Stelutis alpinis” o “La biele stele”), sunadis dal mandulin di Andrea Miola e de ghitare di Giulia Pizzolongo. Jentrade sore nuie. (A.I.) – 06.11.2024