Al è ripartît il doposcuele specialistic par arlêfs cun Dsa (disturps specifics dal aprendiment) e Bes (bisugns educatîfs speciâi) residents a Buri o che a frecuentin lis scuelis primarie e secondarie di prin grât presints intal comun. A je une impuartante poie ai arlêfs che a àn dificoltâts, ma ancje un supuart aes fameis.
Il servizi, viodût il gradiment intai agns passâts e lis domandis rivadis, al è stât riproponût intune cun altris servizis e al ven fat di professioniscj formâts sui disturps dal aprendiment e cun esperience intal cjamp. Pai cors a son dopradis lis aulis scolastichis, dulà che la ativitât – organizade in piçui grups, su la base de etât e aes esigjencis didatichis dai utents – si fâs cuntune frecuence di doi incuintris ae setemane de durade di une ore e mieze o doi. (ADG) – 9.11.2022
