Tacant dal Prin di Fevrâr, lis piçulis impresis che a esercitin la ativitât di cumierç al detai, i esercizis publics, i ripârs alpins li che al è faturôs rivâ e i gjestôrs di distributôrs di carburants a podaran presentâ ae Comunitât di mont de Cjargne domande di contribût pe riduzion dai coscj in plui dovûts al disvantaç de posizion.
Lis ativitâts dai 28 comuns de Cjargne che a àn des carateristichis previodudis a podaran domandâ une poie pes spesis leadis ae gjestion dal esercizi comerciâl e, intal câs dai distributôrs di carburants, par gnovis instalazions o inmodernament. Il contribût al sarà minim di mil euros e fin a un massim di 2.500 euros; la sume e podarà jessi dopleade intal câs là che la imprese e dedi cierts servizis in plui. (A.D.G.) – 01.02.2023
