Lâ a vendemâ intune aree archeologjiche

La aree archeologjiche des grandis termis di Aquilee, conferide ae Fondazion Aquilee, e cjape dentri di decenis un vignâl di 5.000 metris cuadris. La Fondazion e à pensât di ufrî chest an ai visitadôrs une esperience uniche: la vendeme intun vignâl storic dentri di un sît di impuartance straordenarie dal pont di viste archeologjiche. Sabide ai 24 aes 9 di matine (gjavant cambiaments pal meteo) al sarà pussibil partecipâ ae vendeme de ue nere su prenotazion obligatorie (fin al otigniment dal limit dai puescj previodûts), scrivint a ufficiostampa@fondazioneaquileia.it. Il vignâl al è dentri te aree tra lis Grandis Termis e il Teatri antîc e al rapresente il simbul di une vocazion che e fonde lis propriis lidrîs intal periodi roman e al rive, traviers la Ete di mieç, fin a vuê. (A.I.) – 20.09.2022